МАН-ын ахмад зүтгэлтнүүд, залуучуудаас МАН-ын Удирдах зөвлөлд Онц их хурлыг хуралдуулах шаардлага хүргүүлж буй талаараа мэдээлэл хийлээ.

Тэдний шаардлагад: "МАН-ын 6, 8-р бага хурлын алдаа, зөрчилтэй шийдвэрээс үүдэн УИХ-ын дарга, Ерөнхий сайд нарын хооронд үүссэн намын даргын албан тушаалын хэрүүл маргаан намын хүрээнээс хальж, УИХ-ын гишүүд, намын сонгуульт албан тушаалтнуудыг талцуулан, нам, гишүүд, ард иргэдийг цочирдуулж, гутамшигт байдалд орууллаа.

Монгол Улсын Үндэсний аюулгүй байдлын зөвлөлийн гишүүн УИХ-ын дарга, Ерөнхий сайд нарын энэ хэрүүл маргаан нь зөвхөн намын даргын албан тушаалын төлөөх маргаан биш гэдэг нь тодорхой байна.

Нэгдүгээрт, Монгол Улсын Их Хурал, Засгийн газрын МАН-ын удирдлагад нам, төрийн удирдах албан тушаалтны өндөр хариуцлага, ёс зүй алдагдаж, хууль зөрчиж, Монголын байгалийн баялаг, төрийн газар нутаг, өмчийг эзэнгүйдүүлэн хувьдаа завших, авлига, хээл хахуулийн бүлэглэл, хувилгааны хууль бус үйл ноёрхож буй бодит илрэл гэж үзэж байна.

Хоёрдугаарт, УИХ болон МАН-ын бага хурал, удирдах зөвлөлд боловсон хүчний бодлого алдагдаж, нам төрийн ажлын мэдлэг, туршлагагүй, эх орон, газар нутаг, ард түмнээ хайрлах сэтгэлгүй, хувиа хичээсэн, луйврын аргаар баяжсан, хариуцлагагүй хүмүүс олширсны улмаас асуудлыг эх орон, ард түмний эрх ашигт нийцүүлэн зарчимч, шударга шийдвэрлэх чадваргүй болсон байна.

Үүний бодит илрэл нь намын 6, 8-р бага хурлын шийдвэр, Монгол Улсын Ерөнхий сайдыг огцруулсан УИХ-ын чуулганы хуралдаан, УИХ-ын талцан хуваагдсан бүлгүүдийн Үндсэн хууль зөрчсөн ноцтой үйл ажиллагаанд тод харагдлаа.

Гуравдугаарт, энэ оны 9-р сарын 28-нд хуралдсан МАН-ын 8-р бага хурлын гишүүд намын даргын сонгуулийг дахин явуулах дүрэм журмаа сайтар ярилцаж, зөвшилцөж шийдвэрлэхийн оронд бүлэглэн талцаж, хоёр нэр дэвшигчийн нэгийг хасаж, хүч түрэмгийлэн санал хураалт зохион байгуулсан нь ноцтой алдаа гаргаж, зөрчил маргааныг улам даамжруулан, УИХ, Засгийн газрын хэрүүл тэмцэл болгож, МАН-ын нэр хүндийг унагаж, намын гишүүд, дэмжигчдээ гутаан доромжилсоор байна. Иймд эх орон, ард түмэн, түүхэн уламжлал, өв соёл, газар нутгаа хайрлах сэтгэлгүй, ёс зүйгүй зарим УИХ-ын гишүүд, төрийн өндөр албан тушаалтнууд гадаад, дотоодын этгээдүүдтэй үгсэн хуйвалдаж, зүй бусаар хөрөнгөжсөн, шударга бус хүмүүсийн бүлэглэл, хуйвалдаан Монгол Улсын Үндсэн хуулийг зөрчиж, засгийн эрхийг хууль бусаар авахыг завдан, үндэсний аюулгүй байдлыг алдагдуулж, улс эх орон, ард түмний эрх ашгийг хохироох ноцтой байдалд хүрлээ.

Энэ байдлыг үндэслэн МАН-ын удирдах зөвлөл, намын Ерөнхий нарийн бичгийн дарга, намын дэргэдэх Ахмадын холбоо, Социал Демократ Залуучуудын холбооны ерөнхийлөгч, Социал Демократ Эмэгтэйчүүдийн холбооны удирдлагуудад дараах шаардлагыг хүргүүлж байна.

Үүнд:

1. Баталсан дүрэм журмаа зөрчиж, алдаа дутагдалтай шийдвэр гарган, бүлэглэл, талцал үүсгэсэн МАН-ын 8-р бага хурал Монгол Улсын Үндсэн хуулийг зөрчиж, Засгийн газрыг огцруулсан УИХ-ын зарим гишүүдийн ноцтой үйл ажиллагаанд дүгнэлт хийж, намын үйл ажиллагааг эрүүлжүүлэх зорилгоор МАН-ын Онц Их хурлыг яаралтай зарлан хуралдуулахыг шаардаж байна.

2. МАН-ын ээлжит 31-р их хурлыг хойшлуулж, Онц Их хурлын дараа хуралдуулах шийдвэр гаргахыг шаардаж байна.

3. МАН-ын онц их хурлыг хуралдуулах тусгай комисс байгуулж, үүссэн нөхцөл байдлыг намын бүх шатны болон намын дэргэдэх төрийн бус байгууллагын хурлаар хэлэлцүүлэн нэгдсэн дүгнэлт хийж, цаашдын бодлого, зорилтоо тодорхойлох шаардлагатай байна.

4. МАН-ын ахмад зүтгэлтнүүд, намаа шинэчлэх залуучуудын хамтын хүч, жигүүрийн энэхүү шаардлагыг дэмжиж, нэгдэхийг нийт гишүүдэд уриалж байна." гэсэн байв.

Уг шаардлагыг танилцуулах хэвлэлийн бага хуралд АИХ-ын дарга асан, УИХ-ын дэд дарга асан Ж.Гомбожав, УИХ-ын гишүүн асан Р.Раш, Ч.Авдай, Д.Цэвээнжав болон МАН-ын "Хамтын хүч" жигүүрийн төлөөлөл оролцсон юм.

Н.Отгончимэг