sonin.mn
Сэтгэгдэл (6)

ВАШИНГТОН, 2025 оны арваннэгдүгээр сарын 7 /AP/. Нэнси Пелоси АНУ-ын Төлөөлөгчдийн танхимын сонгуульд дахин өрсөлдөхгүй гэдгээ мэдэгджээ. Ингэснээр тэрбээр тус танхимын спикерээр ажилласан анхны эмэгтэй болоод зогсохгүй Америкийн улс төрийн хамгийн хүчирхэг хүний ​​​​хувьд түүхэн замналаа дуусгаж байна. 


Сан-Франциског 40 орчим жилийн турш төлөөлж ирсэн Н.Пелоси өөрийн гаргасан шийдвэрээ пүрэв гарагт олон нийтэд зарлажээ. “Би Конгресст дахин сонгогдохын төлөө өрсөлдөхгүй” гэж Н.Пелоси сонгогчдод хандан дүрс бичлэгээр дамжуулан хэлсэн байна.


Н.Пелосигийн олон арван жилийн турш гаргасан ололт амжилтуудыг харуулсан дүрс бичлэгт өөдрөг, алсын хараатай харагдах тэрбээр албан тушаалынхаа сүүлчийн жилийг дуусгана гэдгээ мэдэгджээ. Тэрбээр Конгресст өөрийг нь илгээсэн хүмүүст хандан АНУ болон дэлхий даяар бодлогыг тодорхойлох өвийг үргэлжлүүлэхийг уриалсан байна.


“Хайртай хотдоо хүргэх миний мессеж бол: Сан Франциско, хүч чадлаа мэдэгтүн. Бид түүхийг бүтээсэн. Бид ахиц дэвшил гаргасан. Бид үргэлж тэргүүлж ирсэн” гэж тэрбээр хэлжээ. “Одоо бид ардчиллын бүрэн эрхт оролцогчид хэвээр үлдэж, бидний эрхэмлэдэг Америкийн үзэл санааны төлөө тэмцэж, үүнийгээ үргэлжлүүлэх ёстой” гэж нэмж хэлсэн байна.


Энэхүү шийдвэр нь гэнэтийн биш боловч ирэх онд болох завсрын сонгуулийн өмнө болж байна. Өдгөө 85 настай Н.Пелоси улс төрд хүчирхэг хэвээр байгаа бөгөөд Калифорнийн тойргийг дахин хуваарилахад, мөн энэ долоо хоногийн сонгуульд нам эргэн ирэхэд гол үүрэг гүйцэтгэжээ.


Түүний албан тушаалаасаа буух тухай мэдэгдэл нь түүний залгамж халааг авах хүнийг тодруулах асуудлыг хөндөхөд хүргэж, Капитол дахь түүний үүргийг хэн гүйцэтгэх вэ гэсэн асуултыг нээлттэй үлдээж байна. АНУ-ын Ерөнхийлөгч асан Барак Обама хэлэхдээ, Н.Пелоси Төлөөлөгчдийн танхимын хамгийн шилдэг спикерүүдийн нэг хэмээн түүхэнд тэмдэглэн үлдэх болно гэжээ. 

 



Э.Хулан

Эх сурвалж: "Монцамэ" агентлаг