sonin.mn
Сэтгэгдэл (8)

УИХ-ын үдээс хойш хуралдаанаар Монгол Улсын 2026 оны төсвийн тухай хуулийг хэлэлцэж байна. Үдээс өмнөх хуралдаанд Төсвийн байнгын хорооноос зургаан асуудлыг байнгын хороогоор дахин хэлэлцүүлэх чиглэл өгүүлэхээр хуралдаан даргалагчид хандсан.


Энэ дагуу Төсвийн байнгын хороог хуралдуулж тус байнгын хорооны дарга Х.Ганхуягийн дурдсан зургаан асуудлыг дахин хэлэлцүүлэхээр болов. Гэвч үүнийг эсэргүүцсэн зарим гишүүн ирцээс хасагдах хүсэлт гаргаж буйгаа мэдэгдсэн.


Тухайлбал, УИХ-ын гишүүн Х.Баасанжаргал "11-р сарын 5-ны өдөр Төсвийн байнгын хороо хууль зөрчиж хуралдсан. Тус байнгын хорооны дарга Х.Ганхуягийн өмнөөс Т.Аубакир сайд санал өгсөн. Мөн Т.Аубакир Засгийн газрын гишүүн хэр нь байнгын хорооны хурлыг удирдсан. Ийм хууль бус байнгын хороогоор шийдсэн асуудлыг дахин хэлэлцүүлэх гэж байгаа нь хууль зөрчинө. Тиймээс хууль зөрчсөн хуралдаанд оролцохгүйгээр ирцээс хасагдъя гэсэн юм.


Мөн Төсвийн байнгын хорооны хурлаас ямар зарчмын зөрүүтэй санал гарсныг гишүүд огт мэдэхгүй байна гэв. Ийнхүү гишүүд тус бүрдээ байр сууриа илэрхийлж, маргалдаж эхэлсэн.


Энэ үеэр аргаа барсан УИХ-ын дэд дарга Б.Пүрэвдорж "Байнгын хороогоор хэлэлцсэн зарчмын зөрүүтэй саналууд хэвлэгдэж гишүүдийн гарч очсон байх ёстой. Тамгын газар тэгж ажиллаж байгаа. Би бол бушуухан шиг Х.Булгантуяа ирж удирдаасай гэж бодож байна. Би бол даргын үүрэг гүйцэтгэж байгаа. Х.Булгантуяаг удирдвал Тамгын газрынхан илүү үйлчлэх юм шиг байна.


Намайг байгаа болохоор УИХ-ын үйл ажиллагааг удаашруулсан байдалтай байна. Тиймээс Тамгын газрынхныг ажлаа хийхийг шаардаж байна." гэлээ.