sonin.mn
Сэтгэгдэл (5)

Оросын армийн Украинд явуулж буй ажиллагааг дэмжихийн тулд Иран улс 3 тэрбум орчим долларын үнэ бүхий пуужингуудыг Оросод худалдсан байна. Энэ тухай Блүүмбэрг агентлаг Барууны нэгэн улсын аюулгүй байдлын шинжээчийн ярьснаас эш татан мэдээлжээ. 


Түүний хийсэн тооцоогоор, Оросын цэрэг Украин руу довтлохоос өмнө буюу 2021 оны 10 дугаар сараас хойш Ираны тал 2,7 тэрбум долларын зэвсэг нийлүүлэх хэлцлүүд байгуулсан байна.


Үүнд ойрын зайн тусгалтай Fath-360 баллистик пуужин, мөн ойрын тусгалтай бусад ангиллын 500 орчим баллистик пуужин, 200 орчим зенитийн пуужин багтжээ.  2022 оны хоёрдугаар сард Орос-Украины дайн эхэлснээс хойш ОХУ, Иран хоёр улам ойртон нягтарч эхэлсэн байна. Эх сурвалжийн ярьснаар, Ираны тал хэдэн сая ширхэг сум, их бууны сумыг Орост нийлүүлжээ.


Түүнээс гадна иранчууд 2023 оны эхээр байгуулсан 1.75 тэрбум долларын үнийн дүнтэй гэрээний дагуу Shahed-136 гэдэг цохилтын дроныг нийлүүлсэн ба технологийг шилжүүлэн өгснөөр Орост “Герань-2” дроныг үйлдвэрлэж эхэлсэн байна.


Барууны эх сурвалжуудын мэдээллээр, 2021 оны сүүлчээс хойш Оросын тал нийтээ 4 тэрбум гаруй долларын зэвсэг техник худалдан авчээ. Орос, Ираны ойртон нягтрах үйл явц нь Ираны цөмийн хөтөлбөртэй холбоотойгоор Барууны орнууд хориг тавьж эхэлсэн 2010-аад оноос эхлэлтэй юм. 2025 оны нэгдүгээр сард Техран, Москва хоёр стратегийн түншлэлийн харилцаа тогтоосон боловч уг гэрээнд харилцан бие биенээс хамгаалах талаар тусгагдаагүй байна. Өнгөрсөн онд Израил, Америк хоёр Иран руу довтлох үед Орос улс дорвитой тусламж үзүүлээгүй юм. Үүний сацуу Иранаар дамжин Энэтхэг рүү чиглэсэн худалдааны замыг хөгжүүлэх, хоригийн үр дагаврыг багасгахын тулд санхүүгийн салбарт хамтран ажиллах тухай асуудлуудыг Москва, Техран хоёр хэлэлцэж байна. 



Б.Адъяахүү