sonin.mn
Сэтгэгдэл (6)

УИХ-ын гишүүн, Боловсролын Сайд Л.Энх-Амгалан сэтгүүлчдийн асуултад хариулав.


Энэ үеэрээ тэрээр: "Ард түмэн шударга ёсыг л нэхэж байна. Нэг хэсэг нь хуулийн дээр, нөгөө хэсэг нь хуулийн доор амьдарч болохгүй. Ходоодны өлсгөлөнгөөс илүү шударга ёсны өлсгөлөн хамгийн хүнд байдаг юм байна.

Иймд нүүрсний хулгай, Боловсролын зээлийн сангийн зөрчил, оффтейк гэрээ зэрэг бүх асуудлыг ил тод болгох хэрэгтэй. Юунаас нь айж, нуугаад байна вэ? “Айсан хүнд аргал хөдөлнө” гэдэг шүү дээ. Эдгээр асуудлыг сошиалаар биш, шүүхээр шийдэж, цэг тавих хэрэгтэй. Сонгууль бүрээр нэг сэдэв болгож явж болохгүй.


Аливаа шударга ёсны төлөөх санал, санаачилгыг би дэмжихэд бэлэн. Шүүхийн шийдвэрийг хэрэгжүүлэх ажлаа хийх, шаардлагатай бол өөрсдөө шууд оролцох хэрэгтэй.


Мөн өр барагдуулах чиглэлээр мэргэшсэн байгууллагуудтай гэрээ хийх нь зүйтэй гэж үзэж байна. Боловсролын зээлийн сангийн цөөн ажилтан үндсэн үүргээ хариуцлагатай биелүүлэх ёстой. Нэгэнт гэрээг дүгнэж, бүх зүйл тодорхой болсон бол мэдээллийг ил тод болгох шаардлагатай.

Түүнчлэн 7 сайдын 17 тушаалаар чөлөөлөгдсөн 860 орчим оюутны хувьд хэн нь хууль бусаар чөлөөлөгдсөн, хэн нь шаардлага хангасан гэдгийг нэг мөр шийдэх хэрэгтэй.


Олон зуун хүний үл хөдлөх хөрөнгө барьцаалагдсан байгаа энэ үед зээлийг хүчээр шахах нь тэднийг эх орондоо ажиллах бус, гадаадад өндөр цалинтай ажил хийхэд түлхэж байна.


Тиймээс чадвартай залуучуудаа эх орондоо авч үлдэх бодлого чухал байна.

Ер нь аливаа улс оронд томоохон төсөл хэрэгжихэд амаргүй байдаг. Гэсэн ч манайд том төслүүд хөдөлж, бодитоор хэрэгжээсэй гэж хүсэж байна. Ингэж чадвал дотоодын нийт бүтээгдэхүүн өсөж, нэг хүнд ногдох орлого 10 мянган ам.доллараас давах боломжтой." гэлээ.


Б.Төгсбаясгалан