sonin.mn
Сэтгэгдэл (0)
Гадаадын хөрөнгө оруулалттай компаниудын эрх ашгийг хамгаалах түр хорооноос Засгийн газраас гадаад ажилтнуудыг нэмэлтээр оруулж ирэхийг хориглох шийдвэр гаргасан талаар иргэн С.Зоригтбаатар болон зарим аж ахуйн нэгжүүдийн төлөөлөл мэдээлэл хийлээ.
Энэ үеэр С.Зоригтбаатар: "Аж ахуй эрхлэгчид бид орон сууц, машинаа барьцаалан байж хөрөнгө босгон, улмаар гадаадын аж ахуйн нэгжүүдтэй нийлж, бизнесээ эхлүүлсэн. Гэтэл цар тахлын улмаас өнгөрсөн 6 сарын хугацаанд гадаадын хөрөнгө оруулалттай аж ахуйн нэгжүүдийн үйл ажиллагаа бүрэн зогсоод байна.
 
Бид таван сараас хойш хөрөнгө оруулсан компаниудынхаа  нарийн мэргэжилтнүүдийг оруулах гээд бичиг баримтаа хөөцөлдөж, Засгийн Газар болон УОК-оос  зөвшөөрөл авсан. Гэтэл 39 компанийн 39 мэргэжилтнийг оруулж ирэхийн даваан дээр хилээр гадаадын ажилчдыг нэвтрүүлэхгүй байх талаар хэлэлцэж байна. Албан ёсны шийдвэр гараагүй байгаа хэдий ч Шадар сайд Я.Содбаатар энэ талаар хэвлэлд ярьсан. Энэ нь гадаадын хөрөнгө оруулалттай компаниудын эрх ашгийг ноцтойгоор зөрчиж байна.
 
Иймээс эдгээр 39 компанийн 39 мэргэжилтнийг хилээр нэвтрүүлэх шаардлагыг Шадар сайд, УОК-т хүргүүлж байгаа юм. Хэрвээ гадаадын ажиллах хүчнийг хилээр оруулж ирээгүй тохиолдолд аж ахуйн нэгжүүдийн гадаадаас ажиллах хүчин оруулж ирэхэд гаргасан зардлыг барагдуулж өгөхийг шаардаж байна. Компани аж ахуйн нэгжүүд хохирч болохгүй шүү дээ. Гадаадын компанийн мэргэжилтнүүд бүтээн байгуулалтад маш чухал үүрэг гүйцэтгэдэг. Ер нь гадаадын мэргэжилтнүүд халдвар хамгааллын журмыг маш сайтар сахиж байгаа, тэгээд ч нэг компани мянга мянган хүн оруулж ирээд байгаа юм байхгүй." гэв.
Хэвлэлийн хурал болж байх үед хуульч Х.Бат-Ялалт нар орж ирэн, үгүйсгэж ярьсан бөгөөд хариуд нь С.Зоригтбаатар: "Х.Бат-Ялалт чи Төв Цэвэрлэх байгууламж дээр очоод, баасыг нь цэвэрлэх юм уу? Хэрвээ чиний хүүхэд үхэх гээд хэвтэж байгаа. Хүүхдэд чинь амьсгалын, диализын аппарат хэрэгтэй бол чи янзалж, оруулж ирэхийг л бодно биз дээ?" хэмээн хариулсан юм.
 
Ч.Явуу