sonin.mn
Сэтгэгдэл (41)

Ардын итгэлийг уландаа гишгэж, амин хувийнхаа эрх ашгийг дээдэлсэн адгийн Ерөнхий сайдаар Л. Оюун-Эрдэнэ тодорч байна. Яагаад вэ гэж үү... Хэдэн үгэндээ тар нь танигдана гэж өвгөдийн үг бий. Үр хүүхдийнхээ тансагласан мөнгийг олсон “ Орлогоо нотол” хэмээн жагссан залуусыг засгийн газрын тэргүүн маань хөлс мөнгөөр жагсагчид хэмээн УИХ –ын индэр дээрээс цоллож, 23 настай хүү О. Тэнүүнийхээ найз бүсгүйдээ бэлгэлсэн сүйн бөгжийг 17 сая төгрөг хэмээн хээв нэг хэлж сууна. 

 Ерөнхий сайдын гэр бүлд арван долоохон сая төгрөг бол ардын хүүгийн өрхөд амьдралынхан баталгаа, гадаад сурах боломж, үр хүүхдийнхэн сургалтын төлбөр, зарим чадруухан айлын жилийн хоол ундныхан төсөв байлаа. 


 Л. Оюун-Эрдэнийн гэр бүлийн тансаглал үүгээр тогтохгүй ах Херо Баатартайгаа нийлээд нэг бүр нь 1.5 тэрбум төгрөгний үнэ бүхий автомашин 2 ширхэгийг худалдан авчээ. Энэ гэр бүлд сая, тэрбум төгрөг гэдэг бол юу ч биш цаас болсон гэдгийг энэ хоёр л баримт тод харууллаа. Харин мань Ерөнхий сайдын тайлбар нь “ 14 мега төсөл хөдөлгөж эхлэхээр дайснууд намайг онилдог. Том төсөл, гэрээ хийхээр MSC онилоод, баялагийн хулгайчид дайрдаг” хэмээн дандаа эзэн биегүй байлдаантай зохиол ярьсаар 6 жилийг үджээ. 

 Үнэндээ 32 дахь Ерөнхий сайд шиг хувийн зугаа цэнгэл, тансаглал нь төрийн толгойны өвчин, намынхан олгой нь хагархай болж байсан түүх үгүй. Тэрээр “Шударга 5” гишүүн гэгдэж, төв талбайд МАН –ын дарга, УИХ –ын дарга М. Энхболдыг огцруулахаар жагсаж байхдаа авлига, албан тушаалын хэргийн талаар амаа цуцтал ярьж, хөхөө өвлийн хүйтнээр хөдсөн дээлтэй жагсаж явсан. Улаа бутарсан улаан хувьсгалч маань өөрөө ханцуйндаа ийнхүү гэр бүлээрээ хулгай хийхээр бэлдэж байсныг Монгол түмэн даанч таагаагүй. Тэр бүү хэл Монгол Улсын Ерөнхийлөгч У. Хүрэлсүх ч тааварлаагүй нь үнэн. 


1990 оноос хойш Монгол төрд 16 Ерөнхий сайд энэ албыг хашиж, аваа өгөөтэй буухдаа Л. Оюун-Эрдэнэ шиг сандал ширээтэйгээ зууралдаж, хөмхийгөө зууж, танхимын сайд нараа ч түгжилдээд нутаг буцаагүй. Баялагийн санг би л байгуулсан гэж бархирч, Ухаа худагаа аврья, Ураныг эсэргүүцэе гэх мэт төлбөрт жагсаалыг зохион байгуулж, хөлснийхэн, инфлүүсэр нэртэй нөхдийг ард түмэн, засгийн танхимын өмнө турхирсан гэдгийг олон эх сурвалжууд нотолж байна. Аргаа бараад төрийн тэргүүн УИХ –ын нэгдсэн чуулганд оролцож, ах хүний хувиар сургамж үгээ хэлж, худал, хулгайтай эвлэрэхгүй гэдгээ зарлаж, хамтарсан засгийн газар яагаад тарсан шалтгааныг Ерөнхий сайдаасаа асуугаарай гэхэв.


 Чин үнэндээ төрийн хэргийг “ Гэрэгэ” гэдэг шилэн байшингийн 15 давхарт хэлэлцэж, төрийн сайд, гишүүдийг тэндээ дуудаж, ах Херо Баатар нь ам өчиг, мөнгө төгрөг татаад байдаг тухай Хууль зүйн сайд асан Б. Энхбаяр хүртэл чуулганы хуралдаанд ил тод хэлсэн. Төрийн ордоноос Засгийн газрын асуудал хальж, Ерөнхий сайдын гэр бүлийн хөрөнгө хахаж, үр хүүхэд нь газраар тэнгэрээр зугаалж, тансаглаж байгаатай энэ нийгэм эвлэрэх байсан гэж үү.

 Ийнхүү олон баримт дурьдвал маш их урт түүх, дараалал болно. Эцсийн эцэст хувийн тансаглалаа хувьсгалын асуудал болгосон гол буруутан бол Л. Оюун-Эрдэнэ. Хамтарсан засгийн газраа түгжилдсэн Ерөнхий сайд тэр өөрөө. Тиймээс Баяраа өөрөө л унасан гэдэг шиг Оюук өөрөө л засгаа тараасан юм билээ. 


З.Болороо