Өнгөрсөн Баасан гарагт нийслэлийн Баянгол дүүрэгт байрлах “Gem mall” худалдааны төвд хүн сэтгэл цочирдуулсан, ноцтой хэрэг гарлаа. Тус худалдааны төвийн нэг давхарт байрлах лангууны түрээслэгч эр эхнэрээ, олон нийтийн газар 38 удаа хутгалж, амь насыг нь бүрэлгэсэн байна.

Хэрэг 11:00 цагийн орчимд болжээ. Энэ үед дэлгүүрийн үйл ажиллагаа дөнгөж эхэлж байсан бөгөөд худалдан авагчдын урсгал бага, түрээслэгчид ажлын байрандаа ирээд удаагүй байсан тул хэргийн дуудлага цагдаагийн байгууллагад оройтож бүртгэгджээ.

Албаны эх сурвалжийн мэдээлснээр, хохирогч болон хэрэгт холбогдогч нь гэр бүл байсан ч салах өргөдлөө өгөөд хэсэг хугацаанд тусдаа амьдарч байсан аж. Эхнэр нь худалдааны төвд бие даан ажиллаж байсан бол нөхөр нь ойр ойрхон ирж, хувийн маргаан үүсгэдэг байсныг ойр орчмын худалдаачид мэдээлж байна.

Хэргийг нүдээр харсан гэрчүүдийн хэлж буйгаар, тухайн өдөр ч нөхөр нь урьдын адил ирж, эхнэртэйгээ үлдэх талаар ятгаж, гуйж байжээ. Гэсэн ч удахгүй эмэгтэй орилж эхэлсэн бөгөөд түүнийг аварч зүтгэсэн нэгэн эмэгтэйд халдагч хутга тулган, зугтахад хүргэсэн гэнэ. Энэ үед бусад хүмүүс тусламж дуудан цагдаа, түргэн тусламж дуудсан ч харамсалтай нь хохирогч газар дээрээ амьсгал хураасан байна.

Энэ хэрэг нь Монгол Улсад гэр бүлийн хүчирхийллийн нөхцөл байдал ноцтой түвшинд хүрснийг дахин сануулж байна. Гэр бүлийн маргаан, хувийн асуудал нэрийн дор дарамт, хүчирхийллийг үл тоомсорловол хожим илүү ноцтой, эмгэнэлтэй үр дагаварт хүрч болзошгүйг энэхүү хэрэг харууллаа.

Цагдаагийн байгууллагаас хэрэгт холбогдогчийг шуурхай саатуулж, мөрдөн шалгах ажиллагаа эхлүүлсэн бөгөөд хуулийн дагуу хатуу хариуцлага тооцохоо мэдэгдээд байна.

Сэтгэлзүйч, хуульчдын үзэж буйгаар хардалт нь хүчирхийллийн нэг хэлбэр бөгөөд эхэндээ үгээр, дараа нь үйлдлээр, эцэст нь амь насанд халдах ноцтой эрсдэл рүү хөтөлдөг. Энэ төрлийн хүчирхийллийг цаг тухайд нь таньж, хуулийн байгууллагад хандах нь цаашид үүсч болох аюулаас сэргийлэх чухал алхам гэж үздэг.

Хэн нэгний “хувийн асуудал” мэт харагдах харилцааны хүчирхийлэл олон нийтийн аюулгүй байдалд заналхийлэхүйц хэмжээнд хүрч болохыг энэхүү хэрэг тод харууллаа. Иймд төрийн байгууллагууд, иргэд, олон нийтийн хэвлэл мэдээллийнхэн бүгд л анхаарал хандуулах шаардлагатай байна.

Н.Отгончимэг