sonin.mn
Сэтгэгдэл (22)

8-р сарын 28-ны шөнө Оросын цэргүүд Киев хотыг дрон, далавчит болон баллистик пуужингаар өргөн хүрээтэй довтолсныг Киевийн цэргийн захиргааны дарга Тимур Ткаченко мэдээллээ.


Урьдчилсан мэдээллээр 10 хүн амиа алдсан ба тэдний дунд 14 настай охин багтжээ. Мөн дор хаяж 45 иргэн шархадсан бөгөөд тав нь 7–17 насны хүүхэд, өсвөр насныхан байна. Ткаченко “Энэ бол эцсийн тоо баримт биш, нурсан байшингийн балгас дор хүмүүс байсаар байна” гэж хэлсэн байна.


Дарницкийн дүүрэгт пуужин таван давхар орон сууцыг онож, бүхэл бүтэн орц нурсан бол Днепровскийн дүүргийн 25 давхар байр эвдэрчээ. Мөн дрон есөн давхар байрны хажууд унаж, автомашины зогсоолд түймэр гарсан байна. Шевченковский, Соломенский, Голосеевский, Деснянский дүүргүүд ч довтолгоонд өртжээ. Нийтдээ Киевт 20 газарт цохилт өгсөн байна.


Түүнчлэн “Интерсити+” хурдны галт тэрэгний парк руу довтолж, нэг галт тэрэг ноцтой эвдэрсэн гэнэ. Харин ажилтнууд хоргодох байранд байсан тул амь үрэгдээгүй аж.


Киевээс гадна Винницагийн мужид эрчим хүчний дэд бүтэц өртөж, 29 тосгоны 60 мянган хэрэглэгч цахилгаангүй болжээ. Зарим орон сууц эвдэрсэн ч хүн гэмтээгүй байна. 

Өмнө нь 7-р сарын 31-нд Киевт болсон пуужингийн дайралтаар Святошинскийн дүүргийн орон сууцанд цохилт өгч, 31 хүн амиа алдсан, 159 хүн шархадсан юм. Тухайн үед Ерөнхийлөгч Владимир Зеленский:

“Оросын хийж буй эдгээр харгис дайралтыг уучлах аргагүй. Бид хэзээ ч уучлахгүй” хэмээн мэдэгдэж байв.




Б.Намуун


Эх сурвалж: moscowtimes.ru