sonin.mn
Сэтгэгдэл (1)

БРАЗИЛИА, 2025 оны наймдугаар сарын 29 /Reuters/. Эдийн засгийн хариу арга хэмжээний тухай дотоодын хуулийг АНУ-ын татварын эсрэг ашиглаж болох эсэхэд дүн шинжилгээ хийж эхлэхийг Бразилын Гадаад хэргийн яам пүрэв гаргийн орой засгийн газрын худалдаа хариуцсан байгууллагад /Camex/ үүрэг болгосон гэж энэ талаар мэдээлэл бүхий хоёр эх сурвалж мэдээлжээ. 


Бразилын Конгрессоос энэ оны эхээр баталсан Эдийн засгийн хариу арга хэмжээний тухай хууль нь тус улсын бараа бүтээгдэхүүн, үйлчилгээнд чиглэсэн нэг талын худалдааны арга хэмжээ, тэр дундаа татвар тариф зэрэг сөрөг арга хэмжээнүүдэд хариу өгөх эрх зүйн орчныг бүрдүүлсэн ажээ.


Энэхүү алхам нь Бразилаас нийлүүлэх бараа бүтээгдэхүүнд 50 хувийн татвар ногдуулах АНУ-ын Ерөнхийлөгч Дональд Трампын шийдвэрт Латин Америкийн хамгийн том эдийн засагтай орны зүгээс үзүүлэх хариу үйлдэл улам чангарч буйг илтгэж байна.


Бразилын Ерөнхийлөгч Луис Инасиу Лула да Силва уг хуулийг хэрэглэхийг зөвшөөрсний дараа дээрх шийдвэрийг гаргасан гэж эх сурвалжууд мэдээлжээ. Одоогоор Бразилын тал ямар хариу арга хэмжээ авах нь тодорхойгүй байгаа бөгөөд Camex АНУ-ын эсрэг дээрх хуулийг ашиглахыг зөвшөөрсний дараа тодорхой болох юм.



Э.Хулан

Эх сурвалж: "Монцамэ" агентлаг