ВАШИНГТОН, 2025 оны арваннэгдүгээр сарын 20 /DW/. Украины тал зүүн нутгаа ОХУ-д өгөх, Зэвсэгт хүчнийхээ бүрэлдэхүүнийг цөөрүүлэх, зарим төрлийн зэвсгээс татгалзах ёстой гэсэн шаардлагууд Орос-Украины дайныг дуусгахад чиглэсэн Д.Трампын засаг захиргааны шинэ төлөвлөгөөнд тусгагдсан тухай “Reuters”, “Axios” зэрэг барууны хэд хэдэн хэвлэл эх сурвалжуудыг эш татан лхагва гарагт мэдээлжээ. 

“Reuters” агентлагийн эх сурвалжуудын ярьснаар, 28 заалт бүхий төлөвлөгөөг нь хүлээн зөвшөөрөх ёстой гэдгийг АНУ-ын засаг захиргаа Украины Ерөнхийлөгч Владимир Зеленскийд битүүгээр ойлгуулсан байна.

Уг төлөвлөгөө нь Украинд энх тайван тогтоох, аюулгүй байдлын баталгаа олгох, Европын аюулгүй байдлыг хангах, мөн Орос, Украинтай хийх АНУ-ын харилцааны хэтийн төлөв гэсэн дөрвөн үндсэн хэсэгтэй гэж өмнө нь мэдээлжээ. 

Axios: Газар нутгаасаа татгалзсаны хариуд аюулгүй байдлын баталгаа олгоно

Трампын шинэ төлөвлөгөөнд Донбассыг ОХУ-ын мэдэлд өгөх саналыг тусгасан байна. Украины тал энэ бүс нутгийн 14.5 орчим хувийг хяналтдаа байлгаж байгаа юм. Уг бүс нутгийг ОХУ-д өгсний хариуд Украины тал АНУ, Европын аюулгүй байдлын баталгаанд найдаж болно гэж “Axios” цахим хуудсанд Америкийн нэгэн албан тушаалтны ярьсныг эш татан мэдээлжээ. “Axios”-ын эх сурвалжийн хэлснээр, дайн үргэлжилсэн тохиолдолд Украин ямар ч тохиолдолд Донбассыг алдана, “тиймээс Украины эрх ашгийн үүднээс хэлэлцээрийг одоо байгуулах нь зүйтэй” гэж АНУ-ын эрх баригчид үзэж байгаа ажээ. Трампын төлөвлөгөөнд мөн Херсон, Запорож мужууд дахь фронтын шугамыг одоогийнхоор үлдээх тухай тусгасан байна. 

FT: Зэвсэгт хүчнийхээ бие бүрэлдэхүүнийг цөөрүүлэхийг Украинаас шаарджээ 

Трампын төлөвлөгөөнд мөн Украины Зэвсэгт хүчний бие бүрэлдэхүүнийг хоёр дахин цөөрүүлэх, мөн Оросын нутгийн гүнд цохилт өгөх чадалтай холын тусгалтай зэвсэг ашиглахыг хязгаарлах гэсэн шаардлагууд багтсан гэж “Financial Times” сонинд гарсан нийтлэлд дурджээ. 

АНУ-ын засаг захиргаа Украины дайныг дуусгах шинэ төлөвлөгөөнийхөө талаар Оросын эрх баригчидтай нууцаар хэлэлцээ хийж байна гэж “Axios” цахим хуудсанд лхагва гарагт мэдээлжээ.

Уг баримт бичгийг эцэслэн боловсруулах ажлыг АНУ-ын Ерөнхийлөгчийн тусгай элч Стивен Уиткофф гүйцэтгэж, шинэ төлөвлөгөөний заалтуудыг ОХУ-ын Ерөнхийлөгчийн тусгай төлөөлөгч Кирилл Дмитриевтэй хамтран хэлэлцэж байгаа аж.

Д.Жаргал

Эх сурвалж: "Монцамэ" агентлаг