sonin.mn
Сэтгэгдэл (0)

Хятадын Логистик, худалдан авалтын холбоо 1-р сарын 7-нд мэдээлснээр, 2025 оны 12-р сард Хятадын логистикийн салбарын хөгжил, идэвхийн индекс 52.4 хувь болж, өмнөх сараас 1.5 нэгжээр өссөн нь жилийн хамгийн өндөр үзүүлэлт боллоо. Энэ нь бодит эдийн засгийн логистикийн эрэлт идэвхтэй хэвээр байгааг, салбарын үйл ажиллагаа тогтвортой, эерэг хандлагатай байгааг харуулж байна.


Гол үзүүлэлтүүдийн хувьд, логистикийн бизнесийн нийт хэмжээ, тоног төхөөрөмжийн ашиглалт, шинэ захиалга, санхүүгийн эргэлт, ажиллах хүчний индексүүд бүгд тэлэлтийн бүсэд хадгалагдаж, өмнөх сараас өссөн байна. Үүний дотор бизнесийн нийт хэмжээний индекс хоёр дахь сардаа дараалан нэмэгдсэн бөгөөд зүүн, төв, баруун бүсүүдийн индекс тус тус 51.7 хувь, 52.0 хувь, 52.9 хувьд хүрч, бүс нутгийн хөгжил жигд, нааштай байгааг илтгэв.


Зах зээлийн хүлээлтийн хувьд, 12-р сард логистикийн үйл ажиллагааны хүлээлтийн индекс 54.8 хувь болж, харьцангуй өндөр түвшинд хадгалагдсан байна. Эрчим хүчний түүхий эд, үйлдвэрлэл болон иргэдийн хэрэглээний эрэлт тогтвортой нэмэгдсэн нь логистикийн нийт идэвхийг дэмжжээ. Төмөр зам, агаарын тээвэр, шуудан илгээмж болон олон төрлийн тээврийг уялдуулан ашиглах салбаруудын хүлээлтийн индексүүд бүгд өндөр түвшинд хадгалагдсан бөгөөд олон төрлийн тээврийн индекс өмнөх сараас 2.2 нэгжээр өссөн байна.


Бүтэн жилийн дүнгээр, 2025 онд Хятадын логистикийн салбарын идэвхийн индексийн дундаж үзүүлэлт 50.8 хувь болж, дөрвөн улирлын дундаж үзүүлэлт улирал тутам дараалан өссөн нь салбарын хөгжлийн хөдөлгөгч хүч тасралтгүй нэмэгдэж, үйл ажиллагааны уян хатан чанар сайжирч буйг харууллаа. Энэ нь Хятадын эдийн засгийг тогтвортой ажиллуулахад чухал дэмжлэг үзүүлсэн байна.