БНХАУ-ын Нанжинд Япончуудын үйлдсэн их хядлагын тухай өгүүлэх “Dead to Rights” киноны тусгай үзвэр өнөөдөр (2026.01.16) Улаанбаатар хотноо зохион байгуулагдлаа.

Энэ үеэр БНХАУ-аас Монгол улсад суугаа онц бөгөөд бүрэн эрхт Элчин сайд Шэнь Миньжуань: "Өнгөрсөн жил БНХАУ-д нээлтээ хийсэн тус киноны тусгай үзвэрийн арга хэмжээг өнөөдөр зохион байгуулж байна. Уг кинонд 1937 оны 12-р сарын 13-ны өдөр Японы арми Хятадын Нанжинд түрэмгийлэн довтолж, 40 гаруй хоногийн турш Хятадын 300 гаруй мянган иргэнийг хэрцгийгээр хөнөөж, хүн төрөлхтний түүхэнд арилшгүй хар толбо үлдээсэн тухай гардаг.

Өнгөрсөн жил энэхүү кино нээлтээ хийх үетэй зэрэгцэн Японы түрэмгийллийн эсрэг Хятадын ард түмний хийсэн дайны ялалтын болон фашизмын эсрэг хийсэн дэлхийн дайны ялалтын 80 жилийн ой тохиосон билээ. Тус ойн хүндэтгэлийн арга хэмжээний үеэр БНХАУ-ын дарга Ши Жиньпин хэлсэн үгэндээ хүн төрөлхтний хувь заяа, баяр гуниг нийтлэг болохыг түүх бидэнд сануулж байна. Дэлхийн улс орнууд тэгш харилцаж, эв найрамдалтай зэрэгцэн оршиж, харилцан туслалцаж байж л хамтын аюулгүй байдлыг хамгаалж, дайны уг сурвалжийг устгаж, түүхэн эмгэнэлт явдал дахин өрнөхгүй байж чадна хэмээн онцлон тэмдэглэсэн байдаг.

Харамсалтай нь өнөөдөр ч зарим улс орон түүхийг эргэцүүлэн санахаас татгалзаж, түрэмгийллийн гэмт хэргийг нуун дарагдуулах оролдлого хийж, түүгээр ч зогсохгүй түрэмгийллийг дахин амилуулахаар санаархаж байна.

Эдгээр нь дайны дараа тогтсон олон улсын дэг журмыг илтэд сорьж, хүн төрөлхтний ёс суртахууныг уландаа гишгэлж байгаа үйлдэл болж байна. Өчигдөр НҮБ-ын дарга онцлон хэлэхдээ өнөөгийн нөхцөл байдлыг эмх замбараагүй байдал гэж дурдсан нь сонсоход үнэхээр гунигтай хэдий ч зовлон шаналал цаашид үргэлжилж болохгүй, энхтайван бол бидний хийж буй бүхний зүрх сэтгэл мөн юм гэдгийг онцолсон нь ихээхэн урам зориг өгч байна.

БНХАУ цаашдаа НҮБ болон Монгол зэрэг найрсаг улс орнуудын хамт дэлхийн энхтайвны төлөө тасралтгүй хичээн, чармайж ажиллахад бэлэн байна." гэсэн юм.

М.Чой