sonin.mn
Сэтгэгдэл (1)

БРЮССЕЛЬ, 2026 оны нэгдүгээр сарын 30 /BBC/. Ираны цэрэг-улс төрийн гол байгууллага болох Лалын хувьсгалыг хамгаалах корпусыг террорист байгууллага гэж зарлах шийдвэрийг Европын Холбооны гишүүн орнуудын Гадаад хэргийн сайд нар пүрэв гарагт Брюссельд уулзахдаа гаргажээ. Энэхүү шийдвэрийг Иран даяар энэ сарын эхээр өрнөсөн эсэргүүцлийн жагсаалд оролцсон хэдэн мянган хүнийг хөнөөсний хариуд гаргасан байна.


“Хүчирхийлэлд хариуцлага тооцохгүй байж болохгүй. Иргэдээ хэдэн мянгаар нь хөнөөж буй аливаа дэглэм өөрөө өөрсдийгөө сүйрэл рүү ойртуулдаг” гэж Европын Холбооны дипломат албаны тэргүүн Кая Каллас X нийгмийн сүлжээнд бичжээ.


Европын Холбооны Гадаад хэргийн сайд нар мөн Ираны 19 иргэн, 12 байгууллага, компанид хориг арга хэмжээ авсан байна. Үүнээс 15 иргэн, 6 байгууллагыг эсэргүүцлийн жагсаалыг дарахад оролцсоных нь төлөө, үлдсэн хүмүүсийг Украины эсрэг Оросын дайнд тусламж үзүүлсэн гэж үзэн хоригийн жагсаалтад оруулжээ. Эсэргүүцлийн жагсаалыг дарахад оролцсон хэмээн хоригийн жагсаалтад оруулсан хүмүүсийн дотор Ираны Дотоод хэргийн сайд Эскандар Момени, Ерөнхий прокурор Мохаммад Мохаведи-Азад, мөн Исламын хувьсгалт гварди болон цагдаагийн өндөр албан тушаалтнууд багтжээ. Европын Холбооноос мэдээлснээр, Ираны эсрэг хориг арга хэмжээний жагсаалтад одоо 247 хүн, 50 байгууллага багтаж байна. Ираны Гадаад харилцааны сайд Аббас Арагчи Европын Холбооны шийдвэрийг “стратегийн ноцтой алдаа” гэж мэдэгдсэн байна. “Одоогоор хэд хэдэн улс манай бүсэд өргөн хүрээний дайныг дэгдээхгүй байхыг хичээж байна. Харин Европын Холбоо эсрэгээрээ мөргөлдөөнийг өдөөж байна” гэж тэрбээр X сүлжээнд бичсэн байна. 



Д.Жаргал

Эх сурвалж: "Монцамэ" агентлаг