АН энэ оны эхээр Үндсэн дүрмээ Дээд шүүхээр баталгаажуулж авсан. Тиймээс, шинэ Үндсэн дүрмийнхээ дагуу намаа дахин “босгох” шаардлага үүссэн. Тэгээд “…Нээлттэй цэгцтэй АН” уриатайгаар дотоод зохион байгуулалтын ажилдаа ханцуй шамлан орсон. Хамгийн эхлээд дотоод сонгуульд санал өгөх эрхтэй гишүүдээ шинээр бүртгэсэн. Гэвч, энэ бүртгэл нь эхлэхдээ л хүний эрхэнд халдсан ноцтой зөрчил үүсгэсэн.

Тодруулбал, АН гишүүддээ зориулсан AN.mn вэбсайтыг хөгжүүлэх явцдаа сонгуулийн насны хоёр сая гаруй иргэний мэдээллийг байршуулсан. Тэнд нь дурын иргэн регистрийн дугаар хийхэд хувийн бүх мэдээлэл гарч ирсэн нь илэрсэн.

Нэр бүхий иргэд “…АН хоёр сая гаруй иргэний хувийн мэдээллийг хаанаас авсан бэ гэдгийг тогтоолгох шаардлагатай. Энэ мэдээллээ задруулсан нь ямар хуулийг зөрчиж байгааг холбогдох байгууллагууд тогтоох ёстой” гээд ХЭҮК, ЦЕГ-ын Кибер гэмт хэрэгтэй тэмцэх хэлтэс болон Цахим хөгжил, инновац, харилцаа холбооны яаманд гомдол гаргаад байгаа юм. Тиймээс холбогдох байгууллагууд энэ асуудлыг шийдэхээр болоод байна. Гэтэл, шинэчилсэн бүртгэлтэй холбоотой үүнээс ноцтой асуудал АН-ынхныг зовоогоод эхэлжээ. Уг нь, шинэчилсэн бүртгэл нь хамгийн чухал нь аж. Бүртгэлд орсон гишүүдийнхээ саналаар АН-ын бүх бүтэц сонгогдоно. Тэр бүртгэл нь 2026 оны гуравдугаар сарын 10-ны шөнө дуусжээ.

АН-аас “…Шинэчилсэн бүртгэлд нь 167 600 гишүүн бүртгүүллээ” хэмээн зарлав. Үүний 65 625 нь АН-д шинээр элссэн гишүүд байгааг мөн мэдээллээ. Гэвч, энэхүү бүртгэл нь маапаантай болж, “…Цаашид хэрхэх вэ” гэдэг дээр гацаа үүсээд байгаа бололтой.

Учир нь, “…Намын шинэчилсэн бүртгэлд өөр намын гишүүд олноороо бүртгүүлсэн байна” гээд АН-ынхан бүх шатандаа баахан бухимдалтай байна. Харин АН-ын хуучин гишүүдийн дөнгөж 50 гаруйхан хувь нь шинэчилсэн бүртгэлдээ хамрагджээ. Нэг үгээр хэлбэл, АН-д “давхар иргэншил”-тэй гишүүд олноороо бүртгүүлсэн байна. Бухимдсан гишүүд нь “...Шинэчилсэн бүртгэлийн явцад нийслэлд 500, 1000-аараа гишүүд шинээр элсэж, автобус унаагаар ачигдаж ирж бүртгүүлсэн. Энэ маапааныг өөр намынхантай нийлж зохион байгуулсан буруутныг олж хариуцлага тооц” хэмээн намынхаа удирдлагуудыг шахаад эхэлжээ. Нийслэлд ингэж шинэ гишүүдээр “хахаж” байсан хэрнээ аймаг орон нутагт бүртгүүлж байгаа болон шинээр элссэн гишүүд хангалтгүй байгааг бүртгэлийн үйл ажиллагааны явцад АН-ынхан яриад л байсан.

Ямар сайндаа АН-ын дарга “…Манай намын батлахтай хүнд Америкийн виз асуудалгүй гардаг”, Нарийн бичгийн дарга нь “…АН-ын гишүүнээр элссэн гишүүдээс сугалаагаар ардчилал хөгжсөн орнуудад аялуулна” гэж ятгаж байх вэ дээ.

Тэр утгаараа, АН-ын 160 гаруй мянган гишүүд биш гэхэд шинээр элссэн 60 гаруй мянган гишүүд нь “но”-той болоод явчихаж байгаа юм. Угтаа, энэ шинээр бүртгэж авсан 160 гаруй мянган гишүүн нь АН-ын Улс төрийн зөвлөл, ҮБХ, Их баг хурлууд, харьяа холбоод гээд бүх бүтцийг сонгох эрхтэй. Ядаж байхад, АН-ын гишүүдийн шинэчилсэн бүртгэл дууссаны дараа төлөвлөсөн ёсоор дотоод сонгуулийнх бүртгэл уржигдар, бямба гаригт орон даяар эхэлсэн. Тэндээс, АН-ын бүх шатны Намын хороодын гишүүд, ҮБХ-ны гишүүд тодрох юм. Товчхондоо, “…Нээлттэй, цэгцтэй АН-ыг бүтээнэ” гээд эхэлсэн ажил нь мордохын хазгайдуу юм болж хувираад байна.

Б.ОЧИР

Эх сурвалж: “Зууны мэдээ” сонин