sonin.mn
Сэтгэгдэл (0)

Сербийн Ерөнхийлөгч Александр Вучич 5-р сарын 24-нд Бээжин хотод хүрэлцэн ирж, БНХАУ-д тав хоног үргэлжлэх төрийн айлчлалаа эхлүүлжээ.


Мөн өдөр тэрбээр нийгмийн сүлжээндээ бичихдээ:


“Би гүн хариуцлага, гүн хүндэтгэл тээж Бээжинд ирлээ. Би Сербийн нэрийн өмнөөс энэхүү айлчлалыг хийж байгаа бөгөөд энэ нь миний улс төрийн замналын хамгийн чухал айлчлал гэдэгт эргэлзэх зүйлгүй. Хоёр улсын ард түмний найрамдал хүнд бэрх цаг үеүүдэд батлагдсан. Өнөөдөр бид тогтвортой байдал, хөгжил дэвшил болон урт хугацааны аюулгүй байдлыг авчрах харилцааг хамтдаа байгуулж байна.


Энэхүү айлчлал Серби болон Хятадын харилцааг улам бэхжүүлж, хамтын ажиллагааны шинэ хуудсыг нээж, ирээдүйд гүнзгий нөлөө үзүүлнэ гэдэгт би итгэлтэй байна" гэсэн байна.


Хятадад айлчлахаасаа өмнөхөн Вучич мөн нийгмийн сүлжээндээ бичихдээ: “Би ялангуяа дарга Ши Жиньпинтэй дахин уулзахыг тэсэн ядан хүлээж байна. Ши Жиньпин дарга Сербийн улс орон, ард түмний төлөө олон жилийн турш хийж ирсэн бүхнийг би үргэлж хамгийн чин сэтгэлийн, гүн талархалтайгаар санаж явдаг.

Энэхүү айлчлал Сербийн хувьд хэмжээлшгүй чухал ач холбогдолтой. Серби, Хятад хоёр улс дэд бүтцийн барилга байгууламж, аж үйлдвэрийн төслүүд зэрэг салбаруудад өргөн хүрээний хамтын ажиллагаа явуулж байгаа бөгөөд улс төрийн түвшний харилцан ойлголцол, тууштай дэмжлэг нь хоёр орны найрамдал цаг хугацаа болон дэлхийн томоохон сорилтуудыг даван туулсны тод жишээ юм. Хятад улс нь зөвхөн эдийн засгийн тогтвортой хөгжлийн үлгэр жишээ бус, мөн олон улсын харилцааны зарчмыг чанд баримталдаг улсын нэг юм" гэжээ.


Г.Бямба