АНУ-Хятадын бизнесийн зөвлөлийн урилгаар Хятадын Олон улсын худалдааг дэмжих зөвлөлийн зохион байгуулсан Хятадын бизнес эрхлэгчдийн төлөөлөгчид 7-р сарын 27-ноос 31-ний хооронд АНУ-ын Солт Лейк, Чикаго, Вашингтон хотуудад айлчилжээ. Энэхүү айлчлалын зорилго нь хоёр улсын бизнесийн нийгэмлэгийг Бээжинд болсон уулзалтын үеэр төрийн тэргүүнүүдийн тохиролцсон чухал зөвшилцлийг идэвхтэй хэрэгжүүлэх, эдийн засаг, худалдааны практик хамтын ажиллагааг өргөжүүлэхэд уриалах явдал гэнэ. Төлөөлөгчдийн бүрэлдэхүүнд Хятадын 22 аж ахуйн нэгж багтжээ.

Айлчлалын үеэр Хятадын Олон улсын худалдааг дэмжих зөвлөл нь АНУ-ын холбогдох байгууллагуудтай хамтран олон тооны бизнесийн уулзалт зохион байгуулж, АНУ-ын 120 гаруй аж ахуйн нэгж, байгууллагатай хэлэлцээ хийсэн гэнэ. Хятадын Олон улсын худалдааг дэмжих зөвлөлийн дарга Рэнь Хунбинь АНУ-ын улс төр, бизнесийн хүрээний янз бүрийн зүтгэлтнүүдтэй уулзаж, Хятадын "15 дахь таван жилийн төлөвлөгөө"-ний тойм болон эдийн засгийн байдлын талаар тайлбарлаж, Хятадын өндөр чанартай хөгжил, өндөр стандартын нээлттэй байдлыг хангах амлалтын талаарх шинэ арга хэмжээг танилцуулж, Хятадын 5 дахь олон улсын хангамжийн сүлжээний үзэсгэлэнг (CISCE) сурталчилсан байна. Тэрээр АНУ-ын аж ахуйн нэгжүүдийг "Хятадын боломжууд 2.0"-д оролцохыг урьж, тус зөвлөл нь хоёр улсын бизнесийн нийгэмлэгийг харилцан ашигтай өндөр түвшинд хүрэхийн тулд олон талт болон хоёр талын практик хамтын ажиллагааг бэхжүүлэхэд дэмжлэг үзүүлнэ гэж онцолжээ.

АНУ-ын улс төр, бизнесийн төлөөлөгчид хоёр улсын төрийн тэргүүний Бээжин дэх уулзалтын талаар өндрөөр үнэлэв. Тэд "15 дахь таван жилийн төлөвлөгөө"-ний хугацаанд Хятадын зах зээл дэх байр сууриа гүнзгийрүүлж, худалдаа, хөрөнгө оруулалтын хамтын ажиллагааг бэхжүүлэхийг хүсэж байгаагаа илэрхийлэв. Тэд мөн APEC-ийн Гүйцэтгэх захирлуудын дээд хэмжээний уулзалт болон 5 дахь олон улсын хангамжийн сүлжээний үзэсгэлэнд идэвхтэй оролцож, дэлхийн аж үйлдвэр, хангамжийн сүлжээний тогтвортой байдал, жигд ажиллагааг хадгалахын тулд хамтран ажиллахад бэлэн байгаагаа илэрхийлжээ.

Г.Бямба