sonin.mn
Сэтгэгдэл (40)

/Бүх ард түмэндээ хүргэх үг/

                      

Монголчууд аа! Өнөөдөр бид улс орон, тусгаар тогтнолоо авч үлдэх үү, үгүй хийх үү?! гэсэн сонголтын өмнө тулж ирээд байна. Нүүрсний хулгайн талаархи “нээлттэй хэлэлцүүлэг”-ийн үед Монгол улс Өмнөговь аймгийн газар нутгаа тэр чигт нь гадны улсын иргэдийн мэдэлд өгчихснийг ард иргэд төдийгүй “Төр”-ийн тэргүүн нь ч сая л олж мэдэв бололтой, хууль зөрчсөн буруутай этгээдүүдийг тогтоон арга хэмжээ авах талаар Монгол Улсын Ерөнхийлөгч У.Хүрэлсүх Засгийн газарт чиглэл өгсөн тухай 2023.12.07-нд хэвлэл мэдээллийн хэрэгслүүдээр зарлан мэдээлэв. 



Даяар олноороо огт анзаарагагүй суусан ийм том бугшмал хэргийг Монгол Улсын “Төр”-ийн тэргүүн маань арга хэмжээ авч засаж залруулахын оронд Засгийн газарт үүрэг чиглэл өгсөн төдийгөө л зарлан мэдэгдэж байгаа нь эрх мэдлийн хэр хэмжээ нь л тэр л дээ. Мэдээж Засгийн Газар ч уг асуудлыг дуулиан болгож байгаад, шийдэх чадал нь хүрэхгүй орхино. Ямар сайндаа л Ерөнхий сайд маань “шүгэл үлээгч”-ийн үүрэг л гүйцэтгэж байх вэ дээ! 



Харамсалтай нь хэлэлцэгдэж буй энэ ноцтой гэмт хэрэг бол дөнгөж захаас нь төнхөж үзэхэд ил гарч ирсэн мөсөн уулын орой төдий л юм.  Уг нь гэмт хэрэг гэдэг тухай бүрт нь цаг алдалгүй таслан зогсоох ёстой Төр засгийн албадын ажил үүрэг болохоос бус хурааж хуримтлуулж байгаад УИХ-ын .. ээлжит чуулганы төлөвлөгөөт ажил болгон хэлэлцэж, “нотлох баримтыг шинжлэн судлах нээлттэй сонсгол” хийж, цаг нөхцөөж суудаг “чих онгойлгох сургалт” биш л дээ.  Хэрэв Монгол Улс жинхэнэ Төр засагтай байсансан бол “Төр”-ийн ордноос нь эхлээд Засаг төрийн гэх албадад нь гэмт хэрэгтнүүд үүрлэснийг ингэж дэлхий дахинд зарлан, булайгаа дэлгэцгээн, ширэн нүүрлэж, шившиг болж суухгүй байсан.  


Монголын нийгэм ийм увайгүй “маанаг гайхал”-уудаар дүүрсэн нь 1992 онд баталсан манай Үндсэн хуулийн хорт агуулгын үр дагавар юм.  


Үндсэн хуулиар “хувийн эрх ашиг, үзэл бодлоороо” нэгдсэн “нам” гэх нэртэй бүлэглэлүүдээс аль нэгийг нь бид сонгож, бүх эрх мэдлийг гартаа оруулж буй тухайн бүлгийг “төр” гэж нэрлэдэг болсон. Гэхдээ “төр” гэгдэж буй тэр “бүлэглэл”-д улс үндэстний эрх ашиг, ард иргэдийн сайн сайхан амьдралыг хангах, хамгаалах ямар ч үүрэг хүлээлгээгүй. Харин ашиг сонирхлынхоо дагуу ямар ч хяналтгүйгээр юу дуртайгаа хийж болох, түүнийгээ хуульчилж байгаад гүйцэтгэх дархан эрхээр хангасан. Шуудхан хэлбэл Төрийн оронд улс орноо тонон дээрэмдэх “албан ёсны эрхтэй” бүтцийг Үндсэн хуулиараа бий болгосон гэсэн үг шүү дээ!    



Ийнхүү төргүй улсыг бий болгосон Монгол Улсын Үндсэн хуулийнхаа утга агуулгыг ч ойлгох сөхөөгүй, 30 гаруй жилийн турш замнахдаа бид “Төр бол хамгийн муу менежер” учраас ард иргэд түүнтэйгээ тэмцэлдэж, жагсаал цуглаан хийж байх нь жинхэнэ “ардчилал”-ын үнэт зүйл хэмээх “албан ёсны” сурталчилгаанд автан донтож, бие биенээ даган хөөрцөглөж, ажил амьдралаа орхин хэрүүл тэмцэл хийцгээж ирлээ.



Яах гэж заавал тийм “хамгийн муу менежер”-ийг байгуулах ёстой юм бэ? гэж нэг ч удаа бид өөрсдөөсөө асууж байсангүй. Цэцэрлэгийн хүүхдүүд “айл гэр болж тоглох” шиг улсаараа тоглож, “хэн нь эрх дархтай хулгайч болох вэ!” гэдэг сонгуулийг явуулж ирлээ.  Цаашид өнөөгийн энэ Үндсэн хуулиар “бүлэглэлүүд”-ийн эрх ашгийг хангахын төлөөх өрсөлдөөнд нийт ард иргэдийг татан оролцуулдаг “сонгууль” гэх “тоглоом”-ыг үргэлжлүүлэх нь утга учиргүй төдийгүй, улс үндэстнийхээ эсрэг явуулж буй хорлон сүйтгэх ажиллагааг дэмжин өөгшүүлсэн ялт хэрэг болох билээ. 



Тиймээс Монгол Улсаа Төртэй болгох шинэ Үндсэн Хуулийг нэн яаралтай хэлэлцэн батлахын төлөө нийтээрээ эвлэлдэн нэгдэцгээе!    



Төр гэдэг бол улс үндэстнийхээ үзэл санааны нэгдлийг хангагч, ёс суртахууныг үлгэрлэгч, хүн бүрийн чадвар, оюун сэтгэлгээний хөгжил, урам зориг, итгэл найдварыг тэтгэн дагуулагч, эв найртай, аз жаргалтай амьдралыг цогцлоон хөгжүүлэх үүрэгтэй, харилцан хамааралт нийгмийн амьдралыг залж зохицуулагч, үүрэг хариуцлага, хяналт, удирдлагын тогтолцоо юм


Бүгдээрээ ухаарагтүн! Улс орныг самууруулсан аминч явцуу намчирхах үзлээ таягдан хаяцгааж, нэгдэцгээе!  


 

Эв нэгдлийн хөдөлгөөн