sonin.mn
Сэтгэгдэл (23)

“Монголын Эдийн засгийн чуулган-Бүсчилсэн хөгжил” чуулган болж байна. Энэ үеэр УИХ-ын гишүүн Ц.Анандбазар хойд бүсийн хөгжлийн талаар байр сууриа илэрхийлэв.


Тодруулбал тэрээр: “Хойд бүсийн хөгжлийн тухай ярихын тулд хойд бүсийн давуу талыг судлах хэрэгтэй. Булган, Хөвсгөл, Эрдэнэтийн бүс Монгол Улсын усны нөөцийн хамгийн их нөөцтэй, хамгийн олон гол мөрөн дайрч өнгөрдөг газар. Усан цахилгаан байгуулах боломжтой.


2024-2028 онд эрчим хүч экспортлогч бүс болох ёстой. Эрдэнэт жишээ нь мухар төмөр замтай. Тэгвэл энэ төмөр замыг Булганаар дамжуулаад Хөвсгөл рүү татах ёстой. Яагаад гэвэл галт тэрэгний хямд. Үүнийг хөгжүүлвэл зах зээлд гарах боломж нээгдэнэ. Манай бүс малаараа улсдаа тэргүүлдэг.


Манай улс 70 сая малтай атлаа сүүгээ гадаадаас импортолж байна. Сүүгээ гадаадаас импортолдог ичгэвэртэй эдийн засагтай байж болохгүй. Сүүний хэрэглээрээ Монголчууд дэлхийд хамгийн сүүлд ордог. Өөрөөр хэлбэл сүү уудаггүй ард түмэн шүү дээ. Тэгэхээр энэ хэрэглээгээ сайжруулж, залуучууд мань сүү ууж, шүдээ хорхойтохоос сэргийлдэг болох ёстой.


Энэ хүрээнд боловсролын салбарт миний өргөн барих гэж байгаа хууль бэлтгэгдэж байна. Бага үдийн сүү гэдэг хуулийн төсөл өргөн барина. 330 сумын цэцэрлэг, сургуулийн бүх хүүхдэд 11.00 цагт 250 грамм сүү өгөх юм. Ингэснээр хүүхдүүд маань эрүүл байхаас гадна малчид маань сүүгээ борлуулж, орлоготой болно.


Нэг литр сүүг 1600 төгрөгөөр худалдаж авахаар хуулийн төсөлд тусгасан. Булган аймгийн Тэшиг суманд цөцгийн тосны үйлдвэр баригдаж байна. 400 ажлын байр бий болсон, дагалдах хоёр том үйлдвэртэй. Эрдэнэт хотыг тахианы өндөг, тахианы махаар чадамжтай ийм том үйлдвэр энэ жил ашиглалтад орж байна. Эрдэнэт үйлдвэр Булган, Хөвсгөлийн малчдын бүтээсэн баялгийг хамгийн түрүүнд худалдаж авах ёстой. Хөвсгөл далайн аялал жуулчлалын өгөөжийг Хөвсгөлчүүдэд сайн хүртээх хэрэгтэй, орлогыг нь нэмэгдүүлэх хэрэгтэй. Би Булган аймагт эв нэгдлийн их суварга барьж байгаа. Энэтхэгт Таж Махал гэж суварга бий. Түүнийг үзэхийн тулд нэг жилд 16 сая жуулчин ирдэг. Энэтхэгийн Таж Махал шиг суварга Булганд баригдаж байгаа, Хөвсгөлд ч барих ёстой” хэмээсэн юм.


М.Чой