sonin.mn
Сэтгэгдэл (58)

Өдгөө дөнгөж 63-хан нас сүүдрийг зооглож буй Ш.Адьшаа гишүүн өнөөгийн парламентад буй зангарагтай, шилээвэр цөөхөн гишүүдийн нэг билээ. Тэрээр хар залуу наснаасаа эхлэн Монгол Улсын прокурор, гаалийн байгууллагыг бэхжүүлэхэд чөмгөө дундартал зүтгэж, нэгэн насны амьдралаа зориулсан ачтай нэгэн. Тиймдээ ч түүнийг өнөөдөр монгол түмэн “Гаалийн Адьшаа” хэмээн авгайлан хүндэтгэн дуудах болсон гэлтэй. Тэр төр түмний төлөөх их үйлсийнхээ хажуугаар монгол орноо шашин соёлыг сэргээн мандуулахад ч хоёргүй ариун сэтгэлээр зүтгэсэн бурхны үнэнч шавь лавтайяа мөн билээ.


Ямартаа л монгол түмний ашдын заяаг төвшитгөх үүднээс улсын төсвийн хөрөнгөөр Богд Зонховын сүрлэг дүрийг бүтээн залах их үйл хэргийг эхлүүлсэн ч төр шашны дайсан болсон балмад этгээдүүдийн бусармаг зохисгүй үйлдэл шүүмжээс болж тэрхүү үйл хэрэгт нь түмэнтээ саад учирсаныг нуух юун.


Түүнийг нэг ангийнхан нь “гүйдэг гишүүн” хэмээн өхөөрддөг. Үнэхээр ч өөрийн хийгээд өрөөл бусдын үйл хэргийн төлөө хэзээд амрахыг үл төвдөн өдөр шөнөгүй зүтгэж, Монгол Улсад урд хөршийн хөрөнгө оруулалтыг татах, бизнесийн найрсаг харилцааг хөгжүүлэхэд тэрээр биширмээр түүх бүтээж яваа нэгэн. Ганцхан жишээ татахад тэрээр зөвхөн нүүрс тээвэр, экспортын чиглэлээр гэхэд арав гаруй компани байгуулсны дийлэнх нь дан Хятад анд нөхөдтэй хамтран байгуулсан аж ахуйн нэгжүүд буй нь үнэхээр бахархууштай.


Харамсалтай нь түүний хөрөнгө оруулалт татаж, хөгжил цэцэглэлтийн төлөө хоёргүй сэтгэлээр чармайн зүтгэсэн энэ бишрэм зүтгэлийг нь улс төрийн балмад этгээдүүд “Нүүрсний сонсгол” гээчээр харлуулан гутаахыг оролдсон ч төдийлэн амжилт олоогүй нь ч бас бодит үнэн.


Монгол төр зүтгэсэн хүндээ халтай гэдгийн үлгэрээр түүнийг төр улс, улс төрд зүтгэсэн цагаас нь эхлэн гаалийн Баатар, хүргэн Дэнзэн, ЭМ-ийн сайд агсан Шийлэгдамбын “Цахим эрүүл мэнд” төсөл, Ховдхаан бирж ХХК-иараа авсан Хөгжлийн банкны зээлийн хэрэг зэрэгт орооцолдуулан мохоохыг удаа дараа оролдсон ч буянтай хүний мөр ямагт гэгээн сайхан байдаг хойно бууж өгсөн удаа нэгээхэн ч үгүй. Тиймдээ ч нүүрсний хулгайн хэрэгт сэрдэгдэн сэжиглэгдсэн ч нүүр бардам даван туулж чадсан эрхэм шилдэг түшээгээрээ Ховдын ард түмэн төдийгүй хотол монголчууд бид бахархаж байна. Удахгүй улс төрийн сонгууль болно.


Төр улсын жолоог түмнээ гэсэн сэтгэлтэй хүндээ атгуулах энэ торгон сонголтдоо ухаант түмэн минь ул суурьтай хандаж Ш.Адьшаа гишүүн шигээ тууштай, няцашгүй зүтгэлтэй, Монголын ард түмний сор болсон буурьтай буурлуудаа улираан сонгох нь та бидний хойдын үйл хэрэгт нэн тустайг онцгойлон захихад илүүдэх юун.


Тэр Ховдыг хөгжүүлж, гаалийг төвшитгөн, өдгөө нүүрс тээврийн салбарын хөгжилд үнэлж баршгүй хувь нэмэр оруулж байгаа шигээ баруун бүсийг урагш дэвшитгэхэд ухааны цараа, мэргэн бодлогоороо олон түмнийг гийгүүлнэ гэдэгт эргэлзэх юун. Саяхан Далай ламдаа бараалхаад ирсэн шилдэг түшээ Ш.Адьшаагийн маань улс төрийн суут замнал дардан байх болтугай. Түүнд монгол төрийн тэргүүнийг ч өлхөн хийж чадах ухаан бодол, улс Монголоо гэсэн чин сэтгэл буй. 


Ё.Билэгт