sonin.mn
Сэтгэгдэл (10)

Ерөнхий Сайд асан, УИХ-ын гишүүн Л.Оюун-Эрдэнэ УИХ-ын гишүүн, ХЗДХ-ийн Сайд Б.Энхбаярыг АТГ-т шалгуулахаар хүсэлт өгөх үеэрээ нэг үг санаандгүй унагачихсан юм. Тодруулбал А.Амундраг уснаас хуурай гаргах зорилготой уг акцийнхаа үеэр тэрээр: "Н.Удаанжаргалыг гадагшаа зугтаалгаад..." гэчихсэн билээ. Тэгвэл Н.Удаанжаргал гэж ер нь хэн юм бэ? хэн гадагшаа зугтаалгачихсан юм гэдэг асуулт гарч ирнэ. Гашуунсухайт-Ганцмод боомтын төмөр замыг барихаар 

“Бодь интернэшнл” ХХК-тай төрийг төлөөлж гэрээ байгуулсан “Таван толгой төмөрзам” компаний захирлаар Н.Удаанжаргал ажиллаж байсан юм. Маш энгийнээр хэлэхэд төр талаасаа "Амундра" байсан л гэсэн үг.


Өөрөөр хэлбэл хэрэв Гашуунсухайт-Ганцмод боомтын төмөр замыг барихад ямар нэгэн хулгай луйвар, асуудал гарсан бол түүнийг маш сайн мэдэх хүн бол Н.Удаанжаргал .


Иймээс ч Н.Удаанжаргал 2022 оны аравдугаар сард эх орноосоо зугтсан. Л.Оюун-Эрдэнийхээр бол зугтаалгасан. Тэгвэл Н.Удаанжаргал гэж хэн бэ?

Н.Удаанжаргал нь удам дамжсан улс төрч бөгөөд УБХ, УИХ-ын гишүүн асан, Санхүүгийн зохицуулах хорооны Тамгын газрын дарга, Буянт-Ухаа дахь Гаалийн газрын дарга асан Ж.Норовсамбуу агсны хүү. Н.Удаанжаргалын хувьд МАН-ын Шинэчлэлийн хорооны ерөнхий нарийн бичгийн дарга, Монголын Оюутны холбооны Ерөнхийлөгчөөр ажиллаж байгаад Д.Амарбаясгалангийн зөвлөхөөр томилогдсон нэгэн юм.


Ерөөс түүний хашсан улс төрийн хамгийн өндөр албан тушаал бол МАН-ын ЕНБДаргын зөвлөх.


Чухам Д.Амарбаясгалангийн зөвлөхөөр ажиллаж байгаад л тэрээр “Таван толгой төмөрзам” ХХК-ий захирал болсон гэсэн үг. Улмаар 2021 оны 6-р сарын 5-нд тухайн үеийн Ерөнхийлөгч Х.Баттулгаас Монгол Улсын Хөдөлмөрийн баатар цол хүртэж байсан билээ. Улс төрийн хүрээнд тухайн үедээ түүнийг Х.Баттулга, Д.Амарбаясгалан нарыг холбодог гэж ч ярьдаг байв.


Б.Итгэл