sonin.mn
Сэтгэгдэл (32)

Иргэний Зориг-Ногоон Намын Дарга Б.Батбаатар, Монголын Хүний Төлөө Намын Дарга Х.Бат-Ялалт, Ард Түмний Олонхийн Засаглал Намын Дарга А.Батдорж, Хөгжлийн Хөтөлбөр Намын Дарга О.Заяа, Монголын Ардчилсан Хөдөлгөөний Намын Дарга Т.Оюунаа, Бүгд Найрамдах Намын Ерөнхий Нарийн Бичгийн Дарга Б.Зоригоо нар мэдээлэл хийв.


Энэ үеэр Х.Бат-Ялалт: "Улстөрийн намууд "ИЗНН"-ын дарга Б.Батбаатарын санаачилгаар хэд хэдэн удаа уулзалт зохион байгуулсан. Ингээд хамтарсан мэдэгдэл хийх нь зүйтэй гэж үзлээ. Дараах 3 асуудлын талаар мэдэгдэл хийж байна. Нэгдүгээрт, энэ удаагийн УИХ-ын сонгууль шударга бус явагдах нь ээ. Хоёрдугаарт, энэ удаагийн сонгуульд хууль зөрчсөн, буруу үйл ажиллагаануудыг эрх баригчдын зүгээс явуулж байна. Мөн бид нийгмийг үндэсний эв нэгдэлд уриалж байгаагаа мэдэгдэж байна.


Энэ удаагийн сонгууль шударга бус болох нь маш тодорхой байгаа. Та бүхэн сонгуулийн тухай хуулийг харж байгаа байх. Сонгуулийн зардлыг тогтоох гэдэг нь Үндсэн хуулийн 14-р зүйлийн хөрөнгө чинээгээр нь хүнийг ялгаварлахгүй байх гэдэг зарчмийг зөрчсөн. Үүнийг бид эсэргүүцэж байна.



Дөрвөн аймгийн нутаг дээр 2.5 тэрбум төгрөг зарцуулах дээд хэмжээ тогтоолоо гэж бодоход ямар ч мөнгөгүй хүнтэй 2.5 тэрбум төгрөгтэй хүнийг өрсөлд, энэ нь шударга өрсөлдөөн гэдэг шаардлагыг төрөөс тавьж байгаа нь Үндсэн хуулийг илэрхий зөрчсөн үйлдэл.



Мөн бидний зүгээс 2-3 асуудлаар Үндсэн хуулийн цэцэд гомдол гаргахаар ажиллаж байна. " гэсэн бол Б.Зоригоо: "Сонгуулийг үеийн үед л ингэж мөнгөөр зодох маягаар худалдаж авах, хахуульдах аргаар явуулж ирсэн. Бид ч үүнд нь бараг дасал болсон байна. Сүүлийн 30 жилийн хугацаанд бидний амьдрал бүр дордсон гэдгийг хүнээр хэлүүлэх хэрэггүй байх. Биднийг яриагүй байж дараа нь гоншгонолоо гэдэг. Яриад байхад үл тоомсорлоод байгаа эрх баригчид сонгуулийн хууль, түүнтэй холбоотойгоор гарах үр дагаварыг энэ хуулийг батлалцсан хүмүүс хариуцна шүү гэдгийг мэдэгдэе. Улстөрд цэвэр агаар оруульё гэж зорьж байгаа парламентад суудалгүй улстөрийн намуудад мөнгө байхгүй.



Харин хэнд сонгогчдыг худалдаж авах их хэмжээний мөнгө байгаа вэ? гэхээр сүүлийн 8 жил дарааллан эрх барьж байгаа МАН, Ардчилсан намууд энэ мөнгийг гаргах чадалтай байна.



Ийм маягаар дахиад л худалдаж авья, луйвраа хийе гэж бодож байгаа бол сонгууль зарлаж яах юм бэ? Зүгээр энэ хүмүүс тэдэн төгрөг өгөх гэж байгаа юм байна, тэгээд УИХ-д гаргах гэж байгаа юм гээд зарлачих. Сонгууль хийх хэрэггүй. Энэ их мөнгөний эсрэг эрүүл ухаантай хүн явахад хүндрэлтэй байна. Өнөөдрийг хүртэл зөвөөр сэтгэж, эрүүлээр хандаж ирсэн хүмүүсээс тийм их хэмжээний мөнгө гарах уу? " гэлээ.



М.Чой