sonin.mn
Сэтгэгдэл (24)

Нийслэлийн Баянгол дүүрэгт Ардчилсан Намын “Бүтэн Ардчилал” бүх гишүүдээс санал авах мөрийн хөтөлбөрийн хэлэлцүүлэг амжилттай зохион байгуулагдлаа. 


Хэлэлцүүлэгт Ардчилсан намын дарга Лу.Гантөмөр, Ардчилсан намын УТЗ-ийн гишүүн С.Эрдэнэ, Ардчилсан намын дэд дарга Ц.Уртнасан, НИТХ-ын төлөөлөгч Д.Энхтуяа, Баянгол дүүргийн АН-ын даргын үүрэг гүйцэтгэгч С.Мөнгөнтулга, УИХ дахь АН-ын бүлгийн орон тооны бус зөвлөх И.Нарантуяа, ҮБХ-ны гишүүн Б.Баттулга, ҮБХ-ны гишүүн Ц.Таванчулуу, ҮБХ-ны гишүүн Н.Нинжбадгар, ҮБХ-ны гишүүн Ц.Алтанцэцэг, ҮБХ-ны гишүүн Л.Нарантуяа, ҮБХ-ны гишүүн Ё.Амаржаргал, ҮБХ-ны гишүүн С.Наранбаатар, ҮБХ-ны гишүүн С.Наранбат, Баянгол дүүргийн ИТХ-ын төлөөлөгчид, Баянгол дүүргийн ардчилсан намын гишүүд оролцов. 


Хэлэлцүүлгийн үеэр Ардчилсан Хүчний Холбоо, Баянгол хөгжил хөтөлбөрийн хорооны хамтарсан ажлын хэсгээс “Бүтэн Ардчилал” Ардчилсан намын гишүүдээс санал авах мөрийн хөтөлбөрийн төсөлд тусгах “Монгол өрх 2024” хөгжлийн бодлогын төслийг боловсруулан Ардчилсан намын дарга Л.Гантөмөрт гардууллаа. 


Тус хэлэлцүүлгээр “Өрийн дарамтгүй, Төрийн дарамгүй Монгол” үндэсний хэлэлцүүлгүүдээс гарсан саналуудыг нэгтгэн нэмэлт саналуудыг тусгаж илүү боловсронгуй болгохын сацуу Монгол Улсын нийгэм, эдийн засаг, хүний эрх, эрх чөлөө, улс төрийн хүрээний тулгамдаж буй асуудлуудыг шийдвэрлэх, монгол хүний амьдралын чанарыг сайжруулах, өр зээлийн хүүгийн дарамтыг бууруулах, Засгийн газрын өр үлэмж хэмжээгээр өссөн асуудлыг шийдвэрлэх, Ардчилсан намын 2024 оны сонгуулийн мөрийн хөтөлбөрт иргэд, олон нийтээс санал авах, хэлэлцүүлэхээр “Бүтэн Ардчилал” бүсчилсэн хөгжлийн бодлогын хэлэлцүүлгийг зохион байгуулж байгаа юм.  


Ардчилсан намын УТЗ-ын гишүүн С.Эрдэнэ энэ үеэр: 


"Өнөөдөр Баянголоор овоглогдож ирсэн хүн бүхэн өнөөдөр Ардчиллын нэр хүндийг үүрэлцэж ирсэн. Баянголчууд үеийн үед Ардчилсан нам дотор манлайлагч нам байсан, цаашдаа ч байх болно. Өнөөдөр бид 2024 оны сонгуульд Ардчилсан намын мөрийн хөтөлбөрт ямар саналуудыг тусгах, бид цаашдаа улс орныхоо хөгжлийг хэрхэн харах вэ? Хөгжлийн бодлогыг хэдэн үе шаттай аль өнцгөөс нь харах юм бэ? Гэдэг тэр бодлогоо уралдуулах гэж энд цуглаад байна. 2024 оны УИХ-ын сонгууль бидэнд ямар их үүрэг хариуцлага ноогдуулж байгааг бид дор бүрнээ ухамсарлах ёстой.


Энэ сонгууль бол Монгол орны ирээдүйн хувь заяа, тусгаар тогтнол, Ардчилал, Эрх чөлөөг авч үлдэхүү үгүй юу гэдгийг шийдэх туйлын хариуцлагатай сонгууль болох гэж байна. Тийм учраас бид дор бүрнээ хариуцлагатай байх цаг үе ирлээ...


Ардчилсан нам иргэдээ сонсдог, судалгаанд суурилсан бодлогын түвшний нам байна." гэсэн бол


АН-ын дарга Л.Гантөмөр: " АН Монголчуудад эрх чөлөөг авчирч өгсөн. АН Монголын тусгаар тогтнолыг бүтэн болгосон. Эдийн засгийнх нь эрх чөлөөг авчирсан. МАН-ынхан сүүлийн үед ардчиллын 30 жилийн тухай их ярьж байна. Яагаад гэвэл өөрсдийнх нь 8 жилд ярьсан амлалт нэг нь ч биелээгүй учраас 30 жилийг хамруулж, тэр дундаас буруутан олохыг хичээж байна. Ардчиллынхан хүмүүст газар өгсөн нь буруу гэнэ, хүмүүст гадаад пасспорт өгөөд гадаад явуулсан нь буруу гэнэ. Ардчилсан нийгэм хэдэн зуун мянган залуучуудаа барууны нийгэм рүү илгээж сургасныг бас буруу гэнэ. АН-ынхан ипотекийн зээл санаачлаад, 300 мянган айлыг орон сууцтай болгосон нь буруу гэнэ. Ард түмний санаа зовж буй гол зүйл бол амьдрал болохгүй байна гэдэг явдал. Өнөөдөртөө Монголд коммунист нам засаглаж байгаа ч гэсэн улс төрийнхөө тусгаар тогтнолыг хадгалж чадаж байна. Харин эдийн засгийн тусгаар тогтнол, энергийн хараат бус байдал, үйлдвэрлэлийн хараат бус байдал, ажилтай, орлоготой болох боломж зэргийг яах вэ? гэдгийг бид хэлэлцэж байгаа. Эдгээрийг шийдэж байж Монголын ардчилал бүтэн болох юм. Гэвч МАН-ынхан коммунист арга барил, үзэл суртлаараа л ажиллаж байна. Даргыгаа хэтэрхий вакумжуулдаг юм байна лээ. Даргыгаа тойрч бүжиглэсээр байгаад Монгол төрийг Монголын ард түмнээс холтгодог. Иргэд төрд, намуудад итгэхээ больсон, түүнийгээ хэлдэг. МАН хэтэрхий их олон зүйл амласан, дааж давшгүй олон гоё зүйл амласан. Чухам л диваажин байгуулна гэж амлачихсан. Ингээд биелээгүй учраас ард түмэн төрд итгэхээ байсан. Ямар азаар АН 2012 онд олонхи болж, жаахан ажил хийж, аймгууд руугаа зам тавьсан юм бэ? хотын замыг жаахан ч гэсэн цэгцэлсэн юм бэ? Даан ч МАН-ынхан цас ч цэвэрлэж чадахгүй байна, зөвхөн ярьдаг болсон.


МАН буюу коммунистууд өнгөрсөн 30 жилийг шүүх гээд байгаа нь ямар зорилготой вэ? гэхээр ардчиллыг буцаах гээд байгаа юм. Нэг хүний дарангуйлал руу аваачих гэж байгаа юм. Ерөнхийлөгчийн засаглал гэдэг их гоё нэр өгнө өө, бас. Би мэдэж байна. Ерөөсөө энэ болохгүй юм байна, олуулаа ялж болдоггүй юм байна, орон нутагт эрх мэдэл өгч болдоггүй юм байна. Харин нэг хүн л удирдах ёстой юм байна.


Ийм л зүйл рүү МАН-ынхан явж байгаа. Өнгөрсөн 30 жилийг муулсаар байгаад, ардчиллыг гутаасаар байгаад, УИХ-ын 2024 оны сонгуулиар ямар ч бодлогын шийдэл гаргах чадваргүй парламент гаргаж ирэхийг зорьж байгаа. Тэр парламент бүдэрсэн өдөр л чухам үндэсний удирдагчаа хайж эхлэх гэж байгаа юм. Иймээс АН-д одоо ардчиллаа авч үлдэх сорилт ирж байна." гэв.


М.Чой