sonin.mn
Сэтгэгдэл (52)

Сэтгүүлч Н.Өнөрцэцэгийн ар гэрийнхэн хэвлэлийн бага хурал хийлээ. Хэвлэлийн хуралд түүний аав, ээж, эгч, дүү нар нь оролцов.


Энэ үеэрээ тэд: "Н.Өнөрцэцэгийг гадуур шалгаж өгөөч гэж Ерөнхийлөгч, Ерөнхий шүүгчээс хүсэж байна. Үр хүүхдүүд нь ч хэцүү байна. Тийм учраас гаргаад, гадуур шалгаад өгөөч ээ. Н.Өнөрцэцэгийг гадуур шалгах шүүх хурал 10 гаруй удаа болсон. Дандаа татгалзсан хариу өгсөн. Үүнд бид их гайхаж байна. Шалгаж байгаа хэрэг нь гадуур шалгах, хилийн хориг тавих заалттай юм байна. Энэ хуулийн заалтаа шүүх нь зөрчөөд нэг сар хорьчихоод ахиад нэг сар хорихоор сунгачихлаа. Бид өмнө нь нэг ч удаа мэдээлэл хийж байгаагүй. Энэ асуудал дээр хүний эрх, хүүхдийн эрх гэдэг утгаар нь холбогдох байгууллагууд нь анхааралдаа аваад өгөөч.



Бид нарыг шалга л даа. Сайн шалга. Бид нарт хэдэн мал л байна. Хэдэн тэрбум төгрөг алга. Гэтэл биднийг маш муухайгаар харлуулж байна. Манай дүүд, бид нарт тийм их мөнгө байхгүй ээ.



Бид нарыг сайн ухах юм бол "Төрийн банк", "Хаан" банкны малчны зээлийн гэрээ л гарна. Өөр юм гарахгүй ээ. 8 ишигний хэрэг дээр 80 настай эмээг мөнгө угаах гэмт хэрэгт холбох гээд байсан шүү дээ. Тухайн үед нь манай дүү мэдээлж байсан. 80 настай эмээг мөнгө угаах гэмт хэрэгт яллах гээд байсан юм чинь одоо миний дүүг яах гээд байгаа юм гэдэгт нь гайхаж байна. Хардаж байна. Хорьчихоод цаагуураа ямар нэг хэрэг тохож, яллаад явуулах гээд байгаа юм уу? гэж хардаж байна. Өөрөө ч хоригдоно гэдэгтээ яван явтлаа итгээгүй. Хорих хэмжээний хэрэг хийгээгүй. Биднийг ч гэсэн шалга, ах дүүг нь ч шалга. Хэрвээ Н.Өнөрцэцэг тийм их мөнгөтэй, тийм баян, улсад хохирол учруулсан, мөнгө угаасан бол бид нар өнөөдөр ядаж банканд зээлгүй байна биз дээ? Банкнаас авсан зээлээрээ тэжээл, бордоо, хүүхдийн хувцас гээд асуудлаа болгоод, мал таргалж, ноолуур гарахаар төлөөд л явдаг.



Бид эхээс тавуулаа. Эгч маань мөнгө угаадаг байсан бол адаглаад аав ээжийгээ зээлгүй байлгана биз дээ. Буруугаар бичээд байгаа хүмүүс үүнийг ойлгоорой.



Дүү маань витамин зараад олсон мөнгөөрөө л түрээсийн байрныхаа мөнгийг төлдөг байсан. Ажлын шаардлагаар бага зэргийн гэрээ хийх зүйл байлгүй яах вэ дээ. Хаалтын гэрээ гээд тэрбумаар нь хаадаг зүйл байдаггүй юм шиг байна лээ шүү." гэсэн юм.



М.Чой